Oggend op Babylonstoren

Tussen Franschoek en Paarl, naby Pniel, is daar die mooiste "eetbare" plaastuin wat oop is vir besoek teen net R10.
  Babylonstoorn is eintlik 'n klein boetiek-oord met baie luukse verblyf teen ongeveer R4 000 per nag. Besoek jy die tuin, is jy baie bewus van jou finansiele status en oral is daar diskrete kennisgewings wat die tuinbesoeker "afsper" van die hotelgaste.  Vir my was die ervaring honderde rande werd en dit was 'n oggend van diep asemhaal en 'n organiese belewenis.  En ek was daar met my rooi sandale en blou sonhoed...

Daar is elke oggend om 10 uur 'n georganiseerde rondleiding.  Die luukse egter, was om net te stap en na die kwerslanings (op Europese wyse bedraad), persimmonbome, verskeidenheid tamaties, en pampoenanke te kyk. Onder die druiweprieele en groot vrugtebome is daar koelte-sitplek.'n Verkwikking soos min.

'n Glaskweekhuis is gedeeltelik omskep tot tuinkafee met baie sitplek buite vir klein onthale. Daar kan jy vrugtesap bestel, keuse: groen, geel of rooi... ek het dadelik vir my die groen een by die huis kom maak met spinasie, grasuie en kruie uit my eie tuin. Probeer dit. Voeg aie komkommer en tamatiesap by...

Die winkel en wynproelokaal was my laaste stop, maar eers moes ek badkamer toe. Soveel ruimte vir een mens op 'n keer het my verstand te bowe gegaan: individuele handdoekies, olyfseep en velroom se weelde was nog 'n 'n paar uur saam met my.

Ek sou hierdie plaas weer wou besoek wanneer ek 'n dag met blanko agenda het!