Saterdagmiddag op Straussburg

Straussburg is ongeveer 10 km buite Upington op die Groblershoop-pad. Vriendin (sedert 1971) Agnes Strauss se neef Stirling is boer en sakeman in die omgewing.
     'n Uitnodiging van jare gelede gebeur toe op die laaste Saterdag van April 2012. Stirling neem ons veld-in om sy leefwereld op die plaas Vryheid aan ons voor te stel.
      Die veld is gesond en die bossies en grasse vreemd vir 'n Karoomens. Stirling - soos sy oorlede pa Nestor Strauss - ken die kos wat die veld voortbring. Hy is 'n bron van (bossie!) inligting... Skilpadbos en perdebos, boegoe, gha en ganna. So ryg hy die name af in die verbyry. Die gras groei gesond en ek hoor van langbeen- en kortbeen boesmangras en blinksaad.
       Die struike staan geil in die veld en die driedoring, wat in die lente blom, skuur-skuur telkens aan die bakkie. Ek verkyk my aan die kameeldoringboom se peule en sy behaaglike skadusambreel.
      Ons ry verby oom Piet-Veepos se huis in die alleenheid van die veld. Net die hondjie blaf en die hoenderhaan loer versigtig uit die hok. Oom Piet het gaan kuier, maar Stirling verseker my dat hy op sy selfoon beskikbaar is.
      Verder pad-af wys Stirling sy Amerikaanse Cowboyperde ... die "Quarterhorses".
      'n Kenmerk van die Naelperd (Quarterhorse) is 'n korterige en kompakte kop met n sterk kakebeen. 

                                                               
                                                                  Kyk die mooi hings!


    Waar is my Saterdae-middae in die bioskoop op Middelburg as die Cowboys deur die kaktusse aangery kom en ek weet stout Piet Botha gaan nou enige tyd die meisies se hare met sy kougom beplak! Menigmaal moes my ma die taai gemors, sopnatgekou uit Piet se mond, met brandspiritus en 'n fyn kammetjie uit my kop verlos. Maar die volgende week sit ek en my maats weer voor in die fliek op die "cheap seats" en wag dat die Rooihuide uit hul skuilplekke moet spring om aksie te bring!.

Daar was tyd om ook by die ametismyn te gaan draai. Lyk soos 'n groot kraak in die aarde!

Noord-Kaap se klippeveld 

Stirling wil niks weet van my hekoopmaakvaardighede nie. Hier staan die "gentleman" gasheer by 'n paaltjieshek met 'n besondere sluitaksie - ook bekend as die "bekslaner-hek"

   

Die middag sien ek troppe springbokke en gemsbokke... spikkels op die horison.

Laatmiddag praat die perde met mekaar en kyk ons katoog uit. Die wit perd is 'n Anglo-Arabier en sy vosmaat 'n Amerikaanse Naelperd (beter bekend as 'n Quarterhorse)

Hierdie deel van die Noord-Kaap  is ook wynwereld en hier groei baie van die "kopseerbosse" onder skadunet (teen 'n koste van ongeveer R120 000 per hektaar). Kopseerbos vir wingerdstok is 'n woord wat ek vir die eerste keer uit Agnes se mond gehoor het. Dit maak nogal sin!

Ongeveer 17:00 het ek my eenvoudige digitale kamera vanaf die ametismyn na die herfswingerde en koppies se kant toe gemik. Gelukkig sit die beeld in sy werklike glorie in my geheue vas.