Kuier by "vreemde mense"

Twee maande gelede soek ek 'n skapeteller in die kuber-ruim. So al gogelend kom ek op Karooplaas af. Die boer - Johan van Wyk - woon in Pretoria maar nooi my om by sy plaasbestuurder buite Prieska, op die Carnarvon-pad, te kuier wanneer ek wil!
      So gebeur dit dat ek die Louw-gesin aan die einde van April op Uitsig ontmoet - en sommer 'n deurdringende Karooreentjie van 44 mm oor twee dae ervaar. Gys en Magrieta Louw en hulle seun Jakob het diep in my hart geklim. Hulle is mense van die aarde wat elke dier en plant ken en met respek behandel. Daarby praat hulle die mooiste Afrikaans wat ek vir 'n lang tyd gehoor het.

Gys verduidelik van skape tel. Hy ken hulle taal en praat dit met sukses! Ek het dit self gehoor! 

     Gys het 'n troppie aangejaag kraal toe om die tellery te demonstreer. Ek het saamgetel maar by 44 het dinge deurmekaargeloop.  Vir my altans! Daarna was dit vir my meer van 'n skouspel om die diere se gedrag dop te hou. Die Dorper wat so kontant op die sementblok (regs) staan is Klaartjie wat haar hanslamdae by die Louws deurgebring het.

So luister die skape na die "verkeersman" (of is dit sensusopnemer?)

     Gys is nou 60 en woon vir die afgelope 25 jaar op Uitsig. Hy het as algemene plaaswerker begin en is nou die plaasbestuurder. Hy het op 12-jarige ouderdom as bokwagter in die Prieska-distrik begin werk en kan nou as "senior burger" die internet bemeester en kommunikeer daagliks met sy werkgewer via die web mbt rekordhouding op die plaas.

Gys by sy skootrekenaar

Die pad na Gys Louw se huis

Ons vier Gys se 25 jaar op Uitsig met braaivleis en vrugtesap... 
en Magrieta se vetkoek! 

     Jakob is op die plaas gebore. Hy is nou 12 en in Graad 6. Hoewel hy 'n nuwe generasie kind is en baie tyd met sy selfoon deurbring, leer hy baie van die veld by sy pa en spog dat hy al self die lammers kan tel.